استذكرت رشا العدل ابنة الممثل المصري الراحل سامي العدل، والدها الذي توفي في شهر رمضان عام 2015.
ونشرت رشا صورة له برفقة ابنتها الصغيرة في صفحتها الرسمية بموقع للتواصل الاجتماعي وأرفقتها بتعليق شرحت فيه اللحظات الأخيرة في حياته وكتبت :"من الصور النادرة لـ بابا مع بنتي حبيبة في عيد ميلادها الأول. هي نزلت الصورة دي وقالت إنه واحشها... رمضان كله بابا، أول يوم رمضان فطرنا عند عمّي الكبير عمّو رمزي ورجعنا على البيت عندي بشنطة هدومه يومها بالليل تعب والفجر طلعنا على اول مستشفى في المهندسين بس رجعنا تاني قبل الفطار وقعد يهزّر ويقول لماما وحشتني الملوخية بتاعتك، طبعاً هي ماكدّبتش خبر وقالت له على عيني، قال لها وأنا هاجيب مشويات".
وتابعت: "يومها بالليل تعب تاني وطلعنا على مستشفى في الدقي وكانت بداية النهاية وكأن كان قلبه حاسس وقال ييجي يودّعني 22 يوم بعد أسبوعين ويوم منهم نقلته مستشفى تالتة بعد ما دخل غيبوبتين وخرج منهم يومها بالليل دخل الغيبوبة التالتة أسبوع بالظبط ومارجعليش تاني وكانت آخر جَمعة في رمضان ليلة وترية في شهر رمضان المبارك".
ثم ختمت رشا حديثها الذي حمل غصّة وألماً قائلة : "ده رمضان بالنسبالنا ذكريات أليمة مزيج مع بعض الذكريات الحلوة أول يومين مع الغالي على قلوب كل اللي عرفه وبالأخص على قلبي أنا. ربنا يرحمك يا قلب قلبي... الرجاء الفاتحة والدعاء لوالدي الفنان الراحل سامي العدل".
