وجّه الممثل والكاتب اللبناني طارق سويد رسالة إلى رئيس الجمهورية ميشال عون وطلب منه أن يحافظ على سلامة المواطنين من خلال إصلاح وصيانة الطرق.
وكتب طارق عبر صفحته الخاصة: "نا مواطن لبناني، ما بتهمّني لعبة السياسة كلّها سوا، ما بهمّني مين بينال هالموقع ومين بيخرج منه، ما بهمّني كيف بتتقسّم الحصص، كلّ اللي بهمّني هو الإنسان ببلدي. يومياً شباب وصبايا عم بيموتوا بحوادث سير، أكتريتها سببها الطرقات المظلمة. وللأسف المسؤولية ضايعة، وعم تضيّع أرواح، بس لأن الجهات المعنية بترفض تتحمّلها. الأشغال بتكبّها ع الطاقة، اللي بترجع بتردّلا ياها، قبل ما الأشغال ترميها للبلديات، اللي بدورها بتكبّها ع جهة جديدة".
وأضاف طارق قائلاً: "دوّامة ترامي المسؤوليات مش ممكن تكون الجواب الشافي لأهل عم يخسروا أولادهم. هيدي مسؤولية فلان روحوا لعندوا، مش جواب لإم وبيّ وإخت وخيّ خسروا أعزّ ما عندهم. فخامة الرئيس اللي عم بقولو مش سخيف ولا ثانوي، إنما أساسي وجوهري عند تشكيل الحكومة. نحن ما بهمّنا مين بيكون بالحكومة، بهمّها أهلنا وناسنا وحقوقنا المهدورة. واجباتنا عم نقوم فيها، والضرايب رغم كترتها مقارنة بالمستوى المعيشي والدخل عم ندفعها، بينما التقصير هو اللي غير مبرّر، واللي مش ممكن يكون القاعدة الدايمة بتسيير حياة الناس ببلدي. الوزارات والأجهزة المعنية اللي عم تترامى اللوم والمسؤوليات، مين عم يحاسبها ويقلّها إنها انوجدت، متل ما انوجدت قبلها الدولة، لتكون بخدمة المواطن والإنسان".
وختم سويد: "فخامة الرئيس، إنت مؤتمن ع حماية الدستور، والدستور بينصّ على حفظ حقوق المواطنين. لهيك فخامة الرئيس، نحن ناطرين منك تتدخّل بهيدا الموضوع شخصياً، وقبل ما نخسر شباب أكتر من اللي خسرناهم. هيدي أقل حقوقنا. سلامتنا أقل حقوقنا، وأهمّ واجب ع الدولة".
