كتبت المخرجة اللبنانية ريما الرحباني، ابنة سفيرتنا الى النجوم فيروز والمؤلف والملحن الراحل عاصي الرحباني، بياناً ردت فيه على كل من يهاجم تصريحاتها الاخيرة، كاشفة عن أسرار عائلية، فقالت:
"بدّي قول شي ليللي بيضلن يفقعوني مواعظ عن الإنسانية والرُقي وكيف لازم كون
وشو لازم اعمل وعيب تجاه هالإرث!!
جميل جميل.
. جميل جداً بس فيكُن ترتاحوا وتشيلوا عنكُن؟
وتفرجوني وين رُقِيّكُن انتو بهالزمن العاق؟ امممم
اولاً على الصعيد الشخصي انا بحب عيلتي وكل فرد منها لأنّي انا طيبة وما بعرف إلا حِب!
ولأن هالبيت ما عاش فيه إلا الحب! ولأن سوى ربينا وسوى قضّينا ليالينا..
لحدما تعب عاصي وصار بدّو يفل وإسْوَدْ لون الفِل! ولحدما وِقِع السَكِتْ حَدْ الكَلام...
من وقتا وجوهُن العارية خوّفت هالة وبيّنت وجوهُن الحقيقيّة صاروا اشرار
كلُّن بيدون ولا اي إستثاء..
بقيت وحدي انا وبيّي وهلي أَلُُُووووونْ كما خلقتني يا رب!
كانوا قشُّوا البيت وقشُّوا الدني كلّا ودفاتر عاصي اللي لا بتنعد ولا بتنقاس!
وما عادوا معاوزين شي مننننا ومن عاصي...
ورغم هيك لا حقدِت ولا عاملتُن بالمِثِل بس تا قول ما زعلت؟ اكيد زعلت.. وكتير..
لأن كنت فهمانة انّو العيلة بتكون عكس ذلك حسب ما كنت شوف بيّي وامّي قدّيش
بيبَدُّوا العيلة على كل شيء ومرّات كتير علينا...
وكنت إفتكر الرضى أحلى من الزعل والسلام كنز الكنوز...
اللي قلبو كبير وما عينو بشي ما بيحقُد عا الآخرين ولا بيكرهُن!
انا بأوّل عملين لولاد منصور الكبار كنت معُن إشتغلت معُن من كل قلبي!
شو فيني ساعد كنت ساعد! صور صوّر.. ساعد بأي شي!
وبفيلم آخر الصيف حتّى ساعدتُن على إبن عمتي الزغير وليد اللي كان بطل الفيلم!
مع وحيد جلال لأنّو كان غليظ كتير! ويبطّل بدّو يمثّل فجأة هيك بنص الجَو!
يا وليد عمول هيك لعّبوا طبّقوا.. يجوْمِس! ولد حدا بيقلك ولد! ويصَفّوا هنّي رح يدعوسوه
قدما غليظ! وانا حاول شيل عنُن وإقنعو وإحكيه.. والله من قلبي..
رغم إنُّن هنّي عا الأرجح ما كانوا ممنونين وحتّى اسمي ولا مرّة حطّوه..
بس ما كنت إسأل لأن ما عم اشتغل لمصاري ولا ليحطّولي إسمي!
انّما لأن هيدا كان لعبي واهتمامي الوحيد من انا وزغيرة! ما فيني ربّح حدا جميلة فيه!
هيدا اللي بعرف أعملو.. وهيك بعرف حب!
وبكل هالشي الطبل ما كان الا شوّيط طابة ماكسيموم لغاية ما بيار الضاهر الله يسامحو
جابو لأن عيلتو رحباني وفرضو بستار اكاديمي..
ووقت مات منصور نزلت! وكنت كل الوقت موجودة! ومن قلبي!
بس هنّي كانوا حاطّين حدود! تاري عم يحضّروا الطعنة الجايي وما بدّن هالقُرْب يصير!
كانوا آخدين موقف! وما يسلّموا ويهربوا! وبس قلّن فيروز بدّا تنزل لعندكن يتهرّبوا اكتر بحجّة انو الطبل مشغول الليلة!!! وبعدما انتهى العزا صارت الزيارة وكانوا يا لطيف الكركرة والضحك! بقينا لوِجْ الصبح عندُن محزونين انا وفيروز اكتر منُن..
وقلنالن نحنا حدّكن ما تخافوا من شي..
تاري الهجوم بمخوخُن جاهز وانا يا غافل الك الله..
وتاري لا خايفين ولا شي! ناطرين هاللحظة تا يضربوا بكل ما أوتوا من قوّة!
اولاً بإسقاط عاصي عمداً من كل المعادلة الرحبانية!
تانياً بمنع فيروز من اعادة اي شي من إعمالا وإسكات الصوت!
وبديت المعركة الحقيقيّة اللي كانوا فرشولا أرضيّة تغييب عاصي ٢٣ سنة نهائياً بتاتاً
وإسكات وحرتقة على فيروز.. وحَشِي عقول الناس وضرب مصداقيّة زياد وريما...
اي اي اي لاااااااااااااااااااااا معليه؟ تسِءْ ما حزروا ابداً ولا شوي ما حزروا
ولا بقى بيِنْسكَت!
هيدا إرث عاصي وفيروز اللي عملوه وبنيوه بتعب سنيييييييييييييين طويلة بشغل متواصل
تا إنفجر دماغ عاصي مرّة وتنين وفل بكير وتعبت فيروز وصارت سجرة وحيدي بالليالي العاصفة! وكلّنا تعبنا وفلّت ليال! وانا حياتي تشقلَبِت وصرت مضطرّة احمل الرسالة وكفّي الطريق.. ما عاد فيني فكّر بحياتي انا! صار عليّي ندر البوّابة وحبر الرسالة وِلِع ببالي امانة ببالي!
هيك بتركُن يهدموه ويشوّهوه؟ كيف يعني؟ كيف؟ شو إلُن فيه؟
ما بزيادة بيجيهُن مصاري عا الباب المستريح بيدون ما يعملوا ولا جهد؟
ما بزيادة فيروز شهَرِتُن كلُّن وصاروا يتشاوفوا عا الناس بإنّو هنّي العيلة المالكة!
كمان بدُّن ينهبوا الباقي ويشوّهوه وينَصّبوا حالُن عيلة الفرعون؟
ما فشروا عا رقبتُن
انا بنت فيروز وبخجل قول! وبوطّي عيوني بس فوت عا مكان تما يعرفوني
وينظرولي بغير نظرة!!
انا بنت فيروز وما يوم استعملت اسما للإستفادة من ولا اي شي! مهما كان
زغير او كبير! عالحاجز كنت انطر واتبهدل ولا يوم قلت انا فلانة!
بالصف بوقف! عا الاشارة بوقف! بتصرّف متلي متل اي مواطن تحت العادي!
تا تجوا انتو يا أنجاس وكفَّار تستعملوا اسم فيروز وعاصي وشغلُن؟
وتتاجروا فيه وتشوووهووووه!!!!
لا لالالاااااااااااا
سكتت كتير... وبعد عندي حكي كتيييييييييييييير... عُمُر بكاملو بتكَّاتو وثوانيه!!
وإلي سنين بمرّق كل فترة تذكير.. بحاول، بقول، بجرّب.. ابداً
وكلمالُن عا زَوْد وزَوْد وبغاحة!
ولك شرَّعوه لهالإرث للكل تا يهدموه عا الآخير
وما يخلّوه ينتقِل للأجيال الجايي بصوت صاحبة الإرث!
وعتَّموا على كل الاعمال الأصلية... وما عم يشبعوا...
وحقدُن عم ينتقل من جيل لجيل!
اللي تِعبوا على صناعة هالإرث سنين طويلة بلياليها ونهاراتا
وبيدون إنترنت وصلوا للعالميّة بتعبُن وشغلن وابتكاراتُن ونبوغُن..
هيك انتو بدّكن تجوا تقطفوه بلحظة ما فيها ضو قمر!
تخلّصوا حضانة وتوعوا عالميّين؟؟؟؟
انتو اكيد ورثة؟ كيف؟ ما زال ما فاهمين شي من هالإرث!!
كيف فيكُن تكونوا وصايا عا شي بتجهلوه!
مش فاهمين منّو الا قدّيه بيقرّش وقدّيه بيوصّلكن وبيفتحلكُن بواب بلحظة!
شو قصّتكُن؟ شو مشكلتكُن؟ غيّروا مهنة اخي اذا مش قادرينلا أشرف!
والا شرف كمان يوك!؟ تجارة عا الحل يعني وسرقة هيّاها؟
وإستعلاء وفوقيّة! قطيعة مين مفكّرين حالكُن ولاه!
في آلاف الموهوبين بيسوُوكُن ميّة مرّة وما وصلوا لمطرح
لأن اللي متلكُن حاكمين بزعرنتُن! وبإسم حتى ما إلُن فضل إنُن ورتوه!
خلص خلصنا انتو قطّاع طرق وما بتفهموا الا بالتشليح والطعن بالضهر
والحقارة والسرقة والنهب والتزوير والترهيب والتشويه!
ما بتعرفوا شي تاني لا صنعة ولا ادب وما بتفهموا الا بالقواص
اي لقّوا تا قلّكن!
انا بيّي اوّل بارودة صيد جبلي ياها كان عمري ٨ سنين!
وجفت ال١٤/٩ كان عمري ١٢ وقت ورّتني ياه!
وكنت قوّص وصيب! فا يلللا عا المعركة وفرساني حاضرين!
انتو مين تكونوا تا تِتْصرَّفوا بهالإرث بيدون الرجوع لأصحاب الحقوق الشرعيين؟
زياد بجلالة قدرو وطلب موافقة عمّو لما اعاد توزيع الى عاصي لفيروز!
انتو شو تكونوا؟ اولاً نسبةً لزياد تانياً نسبةً للورثة الشرعيين؟
عاصي بكرم أخلاقو ترك لخيّو النص مش تا يجي خيّو يمنع صاحبة العمل من اعادة أعمالا!!
فا كيف بالحري ولاد اللي تكرّم عاصي وعطاه النص؟ يا انجاس!
ومين تكونوا تا تِفِتكوا بهالإرث بيدون موافقة خطيّة منّا!!؟
او لتأذنوا لفلان وفلان يشوّه براحتو!
طبعاً لأن ما الكُن فيه ولا أي شي مستحيل يكون قلبكُن عليه!
مستعدّين تفرفطوه وتبيعوه عا القطعة يا بلا شرف!
غيس وات انتو حتّى منكُن شركا النص!
انتو الربع وبس! ومن كرم اخلاق عاصي برضو!
انتو ربع منصور ونحنا ربع عاصي وفيروز نِصّا معا
فهمتوا او بعيدا؟
يا لاهتين ورا المال والسلطة انتو قرّرتوا الحرب
وافتكرتوا العدد القوّة والمعارف والاعلام والوزرا والنواب وكل شي في بالكون سلطات!
وما فهمتو من عاصي انو نحنا الحق ودمع الناس
والحريّة وغناني الأجيال وضحكات الأطفال
انتو قررتوا ما لنا نختار الا اسمنا ماااا ينكتب او ينكتب بالعار
وطبعا إخترتوا ينكتب بالعار!
فليَكُن!
معروف انو بالعالم الجديد التكنلوجي دايماً في اپغرايد بدّك تعملو
لأن دايما التطوُّر للأحسن المفروض!
إلا بالفن الفيروزي الرحباني الماشي بالمقلوب!
من داونغرايد لداونغرايد.. وبشكل عامودي مُرعب! أيْ شوت ليبر!
إءْ الفن مش بالقوّة! اذا ما عندك شي تقولو..
ما فيك تفرض حالك عا الفن!
حتّى لو عيلتك رحباني!
للشعوب الفيروزية بكافة البلاد العربية وبلاد الإغتراب
بعرف يا أحبّائي قدّيش محبّتكن للفن الفيروزي الرحباني كبيرة!
وبعرف انّو محبّتكن أكبر لفيروز تحديداً
وانا اكيدة انّو حرصكُن على انتقال هالإرث الفنّي العظيم للأجيال الجايي
لا يقل شاناً عن حرصي!
ونظراً لأنو هالإرث يتعرّض بشكل مستديم الى التجارة الفنيّة والمُتاجرة
ويتعرَّض بنفس الوقت الى التشويه والتحريف والتزوير!
أطلب منكن مقاطعة اي حفلات تتاجر بإسم رحبانيات و/او فيروز
او تعيد اي عمل فيروزي صغير كان ام كبير!
كفى متاجرة بهذا الفن وهذا الإرث! هذا الإرث خط أحمر عريض!
وممنوع اي من الورثة و/او غير الورثة التعرّض لهذا الفن!
آملين ان ينتقل هذا الإرث لأجيال وأجيال آتية وستأتي بصيغته الأساسية
التي وصلت اليكم والى كافة العالم عبر الصوت الذي نشر هذا الإرث
وجعل منه بحق إرث!
ريما عاصي الرحباني".
