إنطلاقاً من فكرة خيانة الرجال ورداً على رسالة متابع لها، والتي نصت على أن الرجل لا يخون إلا إذا تم وضعه تحت ضغط من الإغراءات الشديدة أو أن سيدة ضحكت عليه، مشيراً إلى أن "البحر يحب الزيادة"، علقت الإعلامية المصرية رضوى الشربيني في مقدمة برنامجها "هي وبس"، وقالت: "كلنا عارفين أن الرجالة بتخون، يا أما فيه راجل فرفوش بيحب الستات، يا أما مبدأه التعدد، ولكن أنه يخون تحت ضغط دي أول مرة أسمعها، فلو فيه أي واحدة بتتحرش بيك، أو شربتك حاجة صفرا وبتضغط عليك بطريقة معينة، روح بلغ عنها وماتحطش نفسك تحت أي صغط".
وأضافت: " قانون التحرش مش للستات بس، للرجالة كمان، روح بلغ عنها وإحنا كلنا في ضهرك، وأوعي تتكسف علي فكرة، لكن فكرة أن البحر يحب الزيادة فأحب أقول لحضرتك اننا في 2023 الحكاية بقت معكوسة عشان الرجالة بقت عاملة زي بوفيه الأكل المفتوح اللي الأكل بقاله من 4 لـ 5 ايام عليه، كل واحدة تعدي تأكل وتمشي وفيه اللي بطنها بتوجعها فمش بتكرر الاكل منه مرة تانية، وفيه اللي متعودة عل الأكل الحمضان ده. لو الضغوط دي لأن أنت زي الطفل مع الستات اللي بيمارسوها عليك، فأشمعني بتتحول لراجل علي مراتك وتفضل تشخط وتزعق وتجعر والجيران يفضلوا يسمعوك، واللا ماما طلعتلك أن ألف مين يتمناك، كده روح اتعالج عشان تكون راجل مش متاح أو محترم احتمال برضة" .
وأكدت الشربيني: "علي فكرة أنا مش بهاجم الرجالة الخاينة، عشان مش هيستحملوا مني دقيقتين اتكلم عليهم، أنا بس بيتطلب مني أعلق علي حاجة من حد أو حد بيأخد رأي مش أكتر".
