أكد الممثل السوري حسن خليل، أن التعبير خانه، وهو لم يقصد التكبر على المعجبين، وقد رد على الانتقادات والهجوم الذي طاله بهذا الخصوص، من خلال حسابه الخاص على موقع التواصل الاجتماعي.


وأوضح حسن خليل كل التفاصيل، حيث قال: "بعد الضجة يلي صارت بخصوص مقابلتي ببرنامج "شو القصة" مع الإعلامية اللطيفة رابعة الزيات. اقتضى توضيح ما يلي :
أنا حسن خليل الشخص يلي انتظر 13 سنة ليوصل للحظة يلملم فيها شتات سنين تعب و جهد مرّت، و انتظرت لأحصد نجاح من السعي يلي سعيتو بالسنين يلي مضت. لقائي مع السيدة رابعة الزيات كان تجربتي الأولى لمقابلة طويلة و تفصيلية عن حياتي و شغلي، و بهالمقابلة أنا كنت أنا.
يعني كنت حسن يلي الناس القراب بيعرفوه، لا كنت حسن الفنان ولا كنت حسن خليل يلي أخد مكانة بعد شخصية علاء بمسلسل كسر عضم. للمخرجة رشا شربتجي.
اللغط يلي صار بخصوص موضوع المعجبات، خانني فيه التعبير و لكن لم أكن أقصد فيه التقليل من قدر الناس المقصودين، خصوصاً أن أنا شخص اختبرت فضل هالناس عن طريق محبتهم/هنّ يلي عطتني الدافع و كانت هيي الأجر الكبير و تعويض التعب فعلاً. فمن هالمنبر هاد أنا بعتذر عن سوء التعبير، و بأكد على امتناني لكل شخص دعمني ان كان من المقربين أو من المعجبين من الناس.
و بالختام، بتمنى بالأيام أن ننتظر لنشوف الصورة الكاملة قبل ما نحكم عالناس مشان اذا الغلطان فينا نلتمسلو عذر ما نظلمو لمجرد شي سمعناه و ما عرفنا تفاصيلو.
وشكراً للناس يلي تأكدت من نيّتي بعد ما شافوا المقابلة الكاملة".