نشرت الفنانة اللبنانية عبير نعمة مقطع فيديو من أغنيتها الجديدة "فلو"، في صفحتها الخاصة على موقع التواصل الإجتماعي، وأرفقت الفيديو بتعليق روت فيه أسباب طرحها الأغنية والموضوع العميق الذي تحمله في طياتها، وأجابت عن كل التساؤلات قائلةً :"خلف كل ضحكة في دمعة وفي قصة وجع و غياب و وحدة موجودة بكل بيت وخلف كل باب .
. هالفيديو يلي تم تصويره بطريقة "المشهد الواحد" يعني بدون قطع المشهد إخراج صديقي ايلي فهد، بيخبّر كيف اللي بيتركونا بيضلّو عايشين فينا ومعنا.. هيدا الفيديو حتى نضوّي على بعض هالقصص يلي ما حدا بيحكي عنها... لمّا نخسر حدا منحبو منخسر جزء منا معو ومنستحضرو بكل لحظة...يمكن لأن منخاف ننسى.. ليش ما تصوّرِت فَلّو كقصّة حب؟ كان فيها تكون قصة حب وفراق بس قررنا نروح أبعد من هيك.. ولازم نروح أبعد.
ليش قصص نساء؟ لأني امرأة وهيدي قصّتي.. عشت تجربة كتير صعبة بعد معاناتي أكتر من مرّة من إجهاض بأشهر متقدّمة من الحمل.. عشت حالة من الوحدة والانسلاخ والغصّة بتعيشها آلاف النساء يومياً وبتتعامل مع هالوجع كل مرة خلف بواب مسَكّرة، بصمت وعالسّكت. وأضافت نعمة عم نعيش أيام صعبة كتير صار فيها حضور الألم والخسارة والغياب كبير بحياتنا.. والغياب مش بس بيكون بالموت.. لازم ما ننسى إنو نحنا لبعض وما إلنا إلّا بعض.. ما تنسوا.. إنتو مش وحدكن الألم لمّا منتشارك فيه بيصير أقل قساوة ولما نحكي عنو منواجهو بقوة أكثر. وجعنا واحد وسوا منكون أقوى".
يذكر أن الأغنية من كلمات غسان مطر، لحن عبير نعمة وتوزيع موسيقي طارق سكيكر، وقام بإخراج الكليب إيلي فهد.
