إنتقد الممثل اللبناني باسم مغنية أسلوب حياة اللبناني الذي يعتمد على التفاخر والتباهي والمظاهر والبذخ والتبذير على الرغم من أن أغلب اللبنانيين يستدينون ليتباهوا ويصرفوا.
وكتب في صفحته الرسمية على أحد مواقع التواصل الاجتماعي منشوراً مفنداً كيف يعيش اللبناني حياته اليومية، طالباً منه أن يخفف من المصاريف خصوصاً لأننا في مرحلة إستثنائية تتطلب منا الوعي والتدبير وقال:"
ما في شعب بالعالم بيسكن بشقة 250 متر مربع وبيعمل نصفها صالون كبير وسفرة ومطبخ امريكي مفتوح مشان لما يجي عندن ضيوف يقولوا والله بيتهن كبير ومرتب وحلو!
- ما في شعب بيوم عرسه بيدفع راتب 4 سنين مشان يقولوا عليه العالم انو قد المقام وعيلتو بتبيض الوجه!
نحنا كلنا عايشين غلط باختلاف طبقاتنا وإمكانياتنا المادية!
من عند الشخص اللي ماسك آيفون 11 وراتبه على قده، لعند الام اللي بتشتكي غلاء سعر الخضرة وهي بترمي نصها بالزبالة آخر النهار!
لنكون صريحين
نحنا مش فقراء .. نحنا أغبياء
نحنا شعب تعبان تدبيرياَ ..
للأسف مستهلك وغير منتج بالمرة
نحنا شعب بحب التفنيص وبيعشق المظاهر
منتدين لنسافر ونشتري افخم سيارات ونلبس ماركات!
بنشتغل بوظائف ما منحبها ومن خارج اختصاصنا مشان نشتري أشياء ما بنحتاجها، مشان نثير اهتمام أشخاص بنكرهم! تخيلوا!
اليوم من اول هزه صغيرة .. الكل بصيح وبيشكي! كورونا ومصروف كورونا كان درس النا كلنا لنصحى على حالنا ..
طلع فينا نقعد بالبيت ايام طويلة بدون ما نطلع نتسوق ونصرف ..وطلع فينا نتزوج بدون حفلة وصالات ومعازيم ..وفينا وفينا وفينا ... والحياة سهلة اذا تخلينا عن التفكير بكلام الناس وشو بدو يرضى الناس ..وفينا نسلم بدون تبويس وأحضان! البخل شي بشع وانا ما عم قول كونوا بخلاء، بس يا ريت نخفف مظاهر بلا طعمة ..كل التلفونات بتقول الو .. مش ضروري نبيع الكلية ونرهن الكنبايات لنشتري تلفون ما فيو اي فرق عن اللي معنا ..لازم نغير كل أسلوب حياتنا ونعيش على قدنا! على قد بساطك، مد اجريك! ما تدين للتزيين!
وجاءت أغلب التعليقات لتوافق باسم على ما كتبه وتعتبر أننا يجب أن نعيد النظر في تغيير أسلوب حياتنا والتخلي عن التعلق بالمظاهر في هذه المرحلة الصعبة التي نعيشها.
عيش بقدر امكانياتك وبقناعة, القناعة كنز لا يفنى والسعادة بتخلق من الاشياء الصغيرة ويلي بحبك رح يحبك متل ما انت!".
