تحدثت الفنانة اللبنانية كريستينا صوايا عن خطابا رئيس الجمهورية ميشال عون ورئيس الحكومة سعد الحريري، مقدمة لهما نصيحة محببة من مواطنين موجوعين، قائلة على صفحتها الخاصة: "طيب اذا فخامة الرئيس (بالرغم من الطائف و موضوع الصلاحيات) مع الحراك الشعبي و المطالب الشعبية و حكي عن الفساد و المحاسبة و استعادة الأموال المنهوبة و إعادة النظر بتركيبة الحكومة و غيرها من النقاط يلي قال صار الو سنين طارحها بيطالب فيها و اضاف بدعوة الشعب ضمن لجنة يحكوا معه و يعرضوا المطالب.


و اذا ايضا دولة الرئيس الحريري شدد على حق الناس بالتظاهر و انه هو مع الشعب و مطالبه المحقة و انه ورقة الحلول يلي قدمها للشعب صار الو سنتين مقدمها و مطالب فيها و ما عم تتنفذ .... ليش؟
- اولا قديش في تشابه بالحديث بين الاثنين اذا لاحظتوا ؟
-ثانيا الاول رأس الدولة و الثاني سلطة تنفيذية صح؟ و مفروض هني الاثنين القصة كلها! بقي في السلطة التشريعية ما سمعنا حسها!!!
السؤال يلي بيطرح نفسه:
إذا فخامتكم و دولتكم مطالبكم المتشابهة متل مطالب الشعب و متفقين انو الشعب مطالبه محقة و لازم تتنفذ من زمان, اذاً شو أو مين يلي واقف بدربكم و معطّل او معركج تنفيذ هالمطالب من زمان و زمان ؟؟؟؟؟ اقله كنتوا مع فائق احترامي تجاوبوا هالشعب بوضوح بدل ما تخلوه يفقد ثقته عالآخر فيكم و يثور زيادة على النظام و يتمسك لأبعد حدود بمطالبه. من شو خايفين تقلبوا الطاولة و المقايس و تكونوا ابطال متل ما عودتونا و تخلوا التاريخ ينصفكم و يحكي عنكم بايجابية؟! بفتكر تعبتوا لتبنوا هالتاريخ ما تسمحوا يروح هيك أو ينهدم بلحظة على راسنا كلنا.
نصيحة بمحبة من مواطنين موجوعين و قلوب محروقة".