شو بحبّ تمرق قطرات الشتي ع شفافي
تذكرني بنكهة حبيبي اللي اشتقتلو
وشو اشتقت لصدرو الحنون الدافي
بردان قلبي ما فيّ شوفو واوصلّو
شو اشتقت يغمرني وع كتفو نام
وبعيونو حسّ الفرح من جديد
يغنّيلي وتوعى ع الحانو الاحلام
يصير الشتي غيران والدنّي كلّا عيد
ع بالي ارجع ولنّو شي ليلة دقّ ع بابو
ويفتحلي والبسمة تغازل روحي وتشفيها
شو صعب قضّي العمر من بعد غيابو
واتذكر احلى ايّام صعب عليّ امحيها
يا شتي الغفيان ع شرفتو شو نيّالك
طرطق ع شبّاكو وعّي قلّو الحلا مشتاق
ما عاد يعرف من وجوه البشر الا خيالك
وضيّع طعم العسل من بعد ما شفافك داق
قلّو لحبيبي يسعد صباحك يا قمر الحلوين
وجبلي من عندو شوية دفا قرّب تشرين
ومن قهوتو اسرقلك شي فنجان شي شفّة
واغرفلي من نظرات عيونو شي كمشة حنان
ولملم عن كتافو نتفة عطر يحسسني بالامان
ولا تنسى تمرق على شفافو قبل ما ترجع
ومن طعمتون دخلك عبّيلي ولنّو كيس مليان
تداوي عيوني ال من شوقو كل يوم بتدمع
رح انطرك عالسكت توصلّي اغلى امانة
بس ما تطّول غيابك وبعتم الغيم تغيب وتنساني
بيكفّي محرومة من غمرة حبيبي وعيونو
لا تزيدا يا شتي عليّ ورجّع لقلبي حناني .