أوضحت الممثلة إنجي عبد الله حقيقة إصابتها بمرض السرطان، بعدما كانت قد أكدت هذا الخبر عبر صفحتها الخاصة على أحد مواقع التواصل الإجتماعي.
وعلقت إنجي قائلة "أنا بشكر كل الناس اللى سألت عني، أنا فعلاً كنت محتاجة ده خصوصًا وأنا مش فى بلدي، بس حبيت أوضح حاجة، أن الكلام اللى كتبته هو بالظبط اللي الدكاتره قالوه، بس فى بعض المواقع كتبت أنى فى مرحلة يصعب فيها الشفاء، الكلام ده غلط، كل الموضوع أني مينفعش أعمل عملية لأنه في مكان صعب أن يتعمل فيه عملية لانه واصل للنخاع الشوكى، ومش عارفين خبيث أو حميد ومش هيقدروا حتى يأخدوا عينة علشان نعرف، بس في علاج ممكن يوقف نموه أو يقلله، ومفيش حاجة قليلة على ربنا، وأنا كتبت ادعولي، علشان محتاجة أعدى فترة العلاج بسلام مش أكتر، وأنا كويسة ومش في مستشفى، أنا في البيت وحياتي طبيعية جدًا الحمد لله، وباكل كل اللي نفسي فيه من غير تأنيب ضمير أن ده هيتخني أو مش صحي (البنات بس اللى هتفهم الكلام ده".
وأضافت إنجي عبر صفحتها قائلة: "الحمد لله أنا مش متضايقة بالعكس متقبلة وراضية، بس في كلمة في حق حد لازم أقولها هي بنت أنا معرفهاش شخصيًا اسمها (ليديا) كان عندها عشرين سنة وهي توفت تقريبًا من شهر، وكان نازل عنها أخبار كتير على الفيسبوك، أنا أتأثرت بيها أوي مش عارفة ليه، وكنت وبقرا أى حاجة تنزل عنها، وميريام جورج مرة نزلت لينك لقاء للبنت دي فى الراديو قبل ما تتوفى بسنة، كل الكلام ده قبل ما أعرف أى حاجه عندي، المهم دخلت وسمعتها لمدة ساعة بتتكلم عن مرضها وهي بتضحك وسعيدة وراضية وحاسة طول الوقت أن ربنا معاها، وقالت أنا بحاول أوصل رسالة للناس، أنا بصراحة استغربت هي إزاي كده، يا رب إزاي الواحد يكون عنده القوة دي، أنه يواجه حاجة صعبة كده، ويكون راضي ومش بس راضي لا يكون سعيد وكأن مفيش حاجة، الموضوع أخد مني وقت واتأثرت بيها وبكلامها، بس بعد كام يوم الموضوع عدى ونسيت، بس لما عرفت اللي عندي فى الأول أتصدمت وبجد كنت خايفة أوي بس مش عارفة ليه افتكرت البنت دي وافتكرت كلامها، وأنا في حالة نفسية صعبة، وفي عز خوفي قلت يا رب اديني قوة البنت دي، وكنت كل ما أحس بخوف ادعي نفس الدعاء، والله العظيم بعدها أنا حسيت ولا كأن في أي حاجه، وكان لما أي دكتور جديد يأكد نفس الكلام كنت ببقى عاديه خالص، وأنزل من عنده أخرج أتفسح أعمل شوبنج أو أكل حاجة مكنتش باكلها علشان ممكن تتخني، المهم أنا وقتها ما فهمتش يعني هي إيه هي بتوصل رسالة، بس أنا دلوقتي فهمت، واحب أقولك يا(ليديا) رسالتك وصلتني وشكرًا بجد لأنها مش بس فرقت معايا لا دي غيرت حاجات كتير أوي جوايا، أنا كويسة أكتر من أي وقت وعندي أمل وحاسة أنها فترة وهتعدي، ومش مهم خالص أى ظروف صعبة الواحد ممكن يعدي بيها المهم بجد أنك تقرر تعيشها إزاي وهما اختيارين بس، الأول كلنا عارفينه لأنه سهل بس هيخلي حياتك وحياة اللي حواليك صعبة أوي، والتاني أنك تكون زى البنت دى(ليديا)اللى مبطلتش تضحك لآخر يوم، أنا بجد كويسة ومتأكدة أنها مرحلة وهتعدي".
