بعد إشاعات كثيرة طالتها طوال حياتها وكان آخرها شائعة رحيلها ، رحلت الفنانة صباح تاركة خلفها حبها اللامتناهي للبنان وشعبه ولكل محبيها في كل أنحاء العالم .
ونُشر على صفحة الفنانة صباح ، بإدارة كلودا وكارول ، خبر رحيل الشحرورة حيث كُتب :"
يا احباب الصبوحة
الصبوحة اليوم راجعة على ضيعتا عالأرض اللي حبّتا وحبّتا
الصبوحة اليوم راحت عالسما عند الرب الكبير راحت عند اهلا واخوتا اللي اشتاقتلن كتير
صباح الحياة صباح الفرح صباح الابتسامة المشرقة دايما صباح الضحكة المرسومة باصعب الاوقات
بتودعكن وبتقلكن ما تبكو وما تزعلوا عليي وهيدي وصيتي الكن
قالتلي قوليلن يحطو دبكة ويرقصوا بدي ياه يوم فرح مش يوم حزن
بدي ياهن دايما فرحانين بوجودي وبرحيلي متل ما كنت دايما فرّحن
وقالتلي قلكن انه بتحبكن كتير وانو ضلوا تذكروها وحبوها دايماً
يا احباب الصبوحة
الصبوحة ما عادت موجودة معنا بجسدا في هاللحظة
الساعة 3 فجر اليوم طلعت روحا الى الخالق وهي نايمة
حتى في رحيلها كانت هنية ومتل النسمة وما زعجت حدا ولا تعبت حدا
الصبوحة رحلت بالجسد بس رح تضل موجودة بقلوبنا الى الابد
رح نشتقلك كتير كتير كتير يا حبيبتنا
يا ريت كان بايدنا نعطيكي كل لحظة من عمرنا ونخليكي معنا اكتر واكتر
بس هاي ارادة ربنا ..
منحبك صبوحة منحبك للأبد وما رح ننساكي ابداً ابداً
الله يرحمك يا صبوحة ويغفرلك وتكون نفسك بالسما مع الابرار والقديسين
*************************
منبقى نوافيكن بكل التفاصيل الخاصة بمراسم وداع الصبوحة هون على هالصفحة .. خليكن معنا ورجاء كلكن ترفعوا الصلوات هلق لراحة نفس الصبوحة .
(كلودا و كارول)".
من أسرة موقع "الفن" أحر التعازي لعائلة الصبوحة ولكل محبيها ، راجين من الله أن يسكنها فسيح جناته .
